पहिलो पटक सुनसरीको इटहरीमा प्रादेशिक ललितकला प्रदर्शनी हुँदै

सप्तकोशी न्युज डेक्स

सुनसरी । कोसी प्रदेशमा आउँदो फागुन २९ गतेका दिन बृहत् प्रादेशिक ललितकला प्रदर्शनी २०८० सम्पन्न हुन गइरहेको छ । कोसी प्रदेशका १४ जिल्लाहरूका सम्पूर्ण कलाकारका सिर्जनाहरू प्रदर्शनीमा समावेश रहने छ । उक्त प्रदर्शनी इटहरीस्थित म्याट्रिक्स ग्यालरीमा हुनेछ ।

कार्यक्रमलाई सफलतापूर्वक सम्पन्न गर्न कलाकार एवं मेट्रिक्सका अध्यक्ष विक्रमश्री, नेपाल ललितकला प्रज्ञाप्रतिष्ठानका सदस्य सञ्जय वान्तवा, पूर्वका कलाकार, इटहरी उपमहानगरपालिका तथा अन्य संघसस्थाहरू सक्रिय रुपमा लागेका छन् ।

प्रदेशबाट लगभग १५० कलाकारहरुको सहभागिता हुने आकलन आयोजक पक्षको छ । जसमा कलाकारका विविध आयाम र माध्यमका कृतिहरु समाविष्ट हुनेछन् । जस्तैः चित्रकला र मूर्तिकला, स्थापत्य कला, क्षेत्रीयकला, संस्कारजन्य कला, शिल्पकला, प्रतिस्थापन कला, डिजाइन कला, लैण्ड आर्ट, कार्टुन कला, फोटोग्राफी कलालगायतका विविध माध्यम र विधाहरुका कलाहरु प्रदर्शनीमा समावेश हुनेछन् ।

कोसी प्रदेश कला, साहित्य, विविध संस्कृति, शिक्षा र चेतना बृद्दिको चरम उद्गम मुहान हो । यद्यपि पछिल्लो परिवर्तित समयमा चाहेजस्तो अघि बढ्न नसकेको तथा राजनीति रंगहरुकै उतारचढाव बढेको कारणले प्रदेशको कलात्मक ख्याती र महिमा खस्केजस्तो देखिएको हो । त्यसैले प्रदेशको ऐतिहासिक मूलतत्त्व र महिमालाई पुनरावृत्ति गर्ने यो अवसरलाई सबै कलाकारहरुले सरहाना गरेका छन् ।

नेपाल ललितकला प्रज्ञाप्रतिष्ठानको रणनीतिले राष्ट्रिय कला प्रदर्शनीको सन्दर्भलाई छोएर सातैवटा प्रदेशमा प्रादेशिक कला प्रदर्शनीको आयोजना गर्ने अभियोजन सारेको हो । नेपालमा तीन छुट्टा छुट्टै प्रज्ञाप्रतिष्ठान गठन भएपश्चात् सातै प्रदेशमा छुट्टा छुट्टै रुपमा हुने यस्तो प्रादेशिक कला प्रदर्शनीहरुको कार्यक्रम पहिलो हो । 

TAGS

टिप्पणी