Saptakoshinews

इटहरी । इटहरीको व्यस्त बजारका मुख्य चोकमा सवारी दुर्घटना हुँदा स्कुटरमा सवार आमा छोरीको निधन भएको छ ।

पश्चिम दिशाबाट आउँदै गरेको टिपरको ठक्करबाट विपरित दिशाबाट आउँदै गरेको स्कुटरलाई ठक्कर दिँदा भएको सवारी दुर्घटनामा आमा ४२ वर्षीया सरिता चौधरी र २० वर्षीया छोरी अंशु चौधरीको निधन भएको इलाका प्रहरी कार्यालय इटहरीले जनाएको छ ।

ना १ क ९१०७ नम्बरको टिपरको ठक्करबाट आमा सरिताको घटनास्थलमै निधन भएको थियो भने छोरी अंशुको विराट मेडिकल कलेज विराटनगरमा उपचारका क्रममा निधन भएको इलाका प्रहरी कार्यालय इटहरीका डीएसपी माधवप्रसाद काफ्लेले जानकारी दिए । सो दुर्घटना मंगलबार दिउँसो ३स्३० बजे भएको थियो । आा अंशु कोशी सेन्ट जेम्स कलेजमा बीबीएस प्रथम वर्षमा अध्ययनरत रहेको विद्यालयले जनाएको छ । विद्यालयका अनुसार आज उक्त विद्यालयमा शोक बिदा दिइएको समेत जानकारी आएको छ ।

घटनापछि आक्रोशित आफन्त र स्थानीयले ढुङ्गामुढा समेत गरेका थिए । ढुङ्गामुढा प्रहार गर्दा इलाका प्रहरी कार्यालयका डीएसपी काफ्लेसहित ९ जना घाइते भएका छन् भने सशस्त्र प्रहरी बलका ७ जना घाइते भएका छन् ।

आन्दोलन उग्र बन्दै गएपछि प्रहरीले ३४ थान अश्रुग्यास प्रहार गरेको थियो ।आक्रोशित भिडले टिपरमाथी ढुङ्गा मुडा गरेका थिए भने चालकमाथि समेत हातपात गरेका थिए । टिपर चालक सर्लाहीको हरिबन बस्ने अन्दाजी २६ वर्षीय बलबहादुर बम्जनलाई प्रहरीले नियन्त्रणमा लिएको जिल्ला प्रहरी प्रमुख एसपी प्रभु ढकालले जानकारी दिए । घटनाबारे थप अनुसन्धान भइरहेको प्रहरीले जनाएको छ ।