Saptakoshinews

Admin

समाचार

01 July, 2025

212

सप्तकोशी न्युज संवाददाता

काठमाडौं । पश्चिम नेपालमा शुक्रवार राति गएको भूकम्पमा परि हालसम्म कम्तिमा १३६ जनाको मृत्यु भएको छ । यस्तै १६६ जना घाइते भएका छन् ।

भुकम्पमा परि जाजरकोट र रुकुममा ठूलो क्षती भएका छ । जाजरकोटमा मात्र मृत्यु हुनेको संख्या ९८ पुगेको छ, भने रूकुममा कम्तिमा ३८ जनाको मृत्यु भएको रुकुम प्रहरीले जनाएका छन् ।

रुकुम पश्चिमका डिएसपी नमराज भट्टराईले रुकुममा ३८ बढीको मृत्यु भएको र एकसय बढी अस्पतालमा भर्ना भएको जानकारी दिइएका छन् ।

रुकुम पश्चिमका आठबिसकोट नगरपालिका र सानीभेरी गाउँपालिका भूकम्पले बढी प्रभावित भएका छन् । भूकम्पले घर र गोठहरु भत्किएका छन् भने सडकहरु पनि अवरुद्ध भएका छन् ।

डिएसपी भट्टराईले मध्यपहाडी लोकमार्गमा सुक्खा पहिरो खसेर बाटो अवरुद्ध भएको जानकारी दिइएका छन् । भुकम्पले जाजरकोटको भेरी नगरपालिकामा ९ जना र कुशे गाउँपालिकामा ७ जनाको मृत्यु भएका छन् ।

भूकम्पमा परी रुकुम पश्चिममा मृत्यु भएका ३८ जनामध्ये २७ जनाको सनाखत भएको छ ।

भूकम्पमा परी रुकुम पश्चिममा एउटै वडाका २७ जनाको मृत्यु भएका छन् ।

आठबीसकोट नगरपालिका–१४ बाँकेडाँडा, हल्देटोल, ज्यामिरकोट, छेपारे, बाँकेटोल र पिपलचौरसहितका गाउँमा मात्रै २७ जनाको मृत्यु भएको पुष्टि भएको छ । आठबीसकोट–१४ का मात्रै २७ जना छन् । त्यसमध्ये हल्देटोलका २, ज्यामिरकोटका ९, छेपारेका ११, बाँकेटोलका १ र पिपल चौरका एक जनाको मृत्यु भएका छन्।

आठबिसकोट नगरपालिकाकामा १८ र सानीभेरी गाउँपालिकामा ९ जनाको सनाखत भएको छ । मृत्यु हुनेमा बालबालिकाहरु धेरै छन् । भूकम्प प्रभावित क्षेत्रमा भग्नावशेषमा पुरीएकाको उद्धार र राहतको कामलाईसमेत तिव्रता दिइएका छन ।

शुक्रवार राति जाजरकोटलाई केन्द्रबिन्दु बनाएर ६.४ म्याग्निच्युडको भूकम्प गएका थिए ।