Saptakoshinews

Admin

समाचार

01 July, 2025

261

सुनसरी ।आज देशभर महाशिवरात्री पर्व भक्ति र निष्ठापूर्वक मनाइँदैछ । देशभरका शिवालयहरुमा शिवभक्त धर्मअनुरागीहरु भेला भई शिवप्रति भक्तिभाव दर्शाउने गर्दछन् । खास गरेर काठमाडौं पशुपतिनाथमा भक्तजनको घुइँचो लाग्ने गर्दछ ।

हरेक वर्ष लाखौं भक्तजनले महाशिवरात्रीमा पुजा आराधना गर्ने स्थान पशुपतिनाथमा यस पटक पहुँचको भरमा विहानदेखि लाइनमा बसेका भक्तजनलाई निराश बनाउँदै भिआईपीको नाममा सिधै गएर दर्शन गर्ने प्रचलन यस पटकबाट हटाइएर सबैलाई समान ढंगबाट लाइनमा बसेर पुजाआराधना गर्ने व्यवस्था समेत गरिएको छ । महाशिवरात्री भगवान शिव उत्पत्ति हुनु भएको दिन र भगवान शिवजी र माता पार्वतीको विवाह भएको दिन समेत हो । हिन्दू धर्ममा यस पर्वको विशेष महत्व रहेको छ ।

भगवान शिवको विवाहसँग जोडिएर पर्वको रुप धारणा गरेको दिन पनि आज हो । तीन लोकमध्येकै अपार सुन्दरी तथा शीलवती गौरालाई अर्धाङ्गिनी बनाउने शिव प्रेत र पिचाशले घेरिएर रहेका हुन्थे । उनको रुप एकदम अजीब थियो । शरीरमा मसानको भस्म, गलामा सर्पको हार, कन्ठमा विष, जटामा जगत–तारिणी पावन गंगा तथा माथमा प्रलयंकार ज्वाला छ ।

यसैगरी यस पर्वको अर्को महिमा भनेको समुद्र मन्थनको पौराणिक कथासँग पनि जोडिएको छ । सबै पौराणिक कथामा नीलकन्ठको कथा सबैभन्दा चर्चित छ । मान्यता के छ भने महाशिवरात्रीको दिन नै समुन्द्र मन्थन गरिरहँदा कालकेतु विष निकालिएको थियो । भगवान शिवले सम्पूर्ण ब्रम्हान्डको रक्षाका लागि स्वयम्ले ति सबै विष पिएका थिए । त्यही क्रममा उनको कन्ठ वा गला नीलो भएको थियो । त्यसैले भगवान शिवलाई नीलकण्ड पनि भनिन्छ ।

यि र यस्तै धार्मिक तथा पौराणिक सन्दर्भ जोडिँदै गर्दा आजको दिन भगवान शिवका लागि प्रिय दिन अर्थात लिंगको रुप धारणा गरेको दिन बन्न पुगेर आम धर्मानुसारगीहरुले शिवभक्ति प्रदर्शन गर्ने विशेष दिनका रुपमा परिणत भएको मानिन्छ ।

शिवरात्री त्यो रात्रि हो, जसमा शिवतत्वसँग घनिष्ठ सम्बन्ध छ । भगवान शिवको अतिप्रियरात्रिलाई शिवरात्री भनिन्छ । शिव पुराणको ईशान संहितामा बताएको छ कि, फागुन कृष्ण चतुर्दशीको रात्रिमा आदिदेव भगवान शिव करोडौं सूर्य समान प्रभाव भएको लिंगको रुपमा प्रकट भएका थिए । यस्तो मानिन्छ कि, महाशिवरात्रीमा भगवान मानवजातिको एकदम निकट आएका थिए । मध्यरात्रिको समय ईश्वर मनुष्यको सबैभन्दा बढी निकट हुन्छ । यही कारण मानिसहरु शिवरात्रीका दिन रातभर जग्राम बस्छन् ।महाशिवरात्रि अथवा शिवरात्री हिन्दुहरूको प्रमुख चाड हो । यो भगवान शिवको प्रमुख पर्व हो । शिवजी उत्पत्ति हुनुभएको रातका नामबाट नामकरण भएको यो पर्व कालरात्री, मोहरात्री, सुखरात्री र शिवरात्री नामक चार प्रमुख रात्री मध्ये एक पवित्र पर्वका रूपमा पुराणहरूमा वर्णित छ ।

फागुन कृष्ण चतुर्दशीका दिन मनाइने यस पर्वलाई सम्पूर्ण दीन दुःखी र कष्टपूर्ण अवस्थामा रहेका प्राणीहरूको हृदयमा धर्मको उदय गराउने आशुतोष भगवान् शिवको अति प्यारो दिनका रूपमा पनि लिइने गरिन्छ । व्रतोत्सवरूमध्ये सर्वोत्तम कहलिएको महाशिवरात्रीका दिन आज भक्तजनहरूले शुद्ध भई शिव मन्दिरमा पूजा–अर्चना गरी व्रत बस्ने र भगवान् शिवको प्रिय वस्तु दूध धतुरो र बेलपत्र चढाउने गर्छन् ।यस पर्वका दिन उपवास गरी ऊँ नमः शिवाय मन्त्र जप्ने गरेमा सर्वसिद्धि लाभ भई यमलोक जानु नपर्ने धार्मिक विश्वास रहेको छ ।