Saptakoshinews

Admin

समाचार

01 July, 2025

713

सप्तकोशी न्युज संवाददाता

विराटनगर । एमालेका स्थायी समिति सदस्य शेरधन राई नेतृत्वको टोली उम्मेदवारी दर्ता गराएका छन् । माघ ११ गते हुने राष्ट्रियसभा निर्वाचनको लागि कोशीमा नेकपा एमालेले पनि उम्मेदवारी दर्ता गरेको छ ।

एमालेबाट अन्य कोटामा भोजपुरका परशुराम अधिकारी र महिलामा सुनसरीकी रुक्मिणी कोइरालाले उम्मेदवारी दर्ता गराएका हुन् ।

निर्वाचन अधिकृतको कार्यालयमा एमालेका स्थायी समिति सदस्य शेरधन राई नेतृत्वको टोली पुगेर उम्मेदवारी दर्ता गरिएको हो । अधिकारीको प्रस्तावकका प्रदेशसभा सदस्य सिर्जना राई र समर्थकमा जयप्रकाश चौधरी छन् भने कोइरालाको प्रस्तावकमा रामप्रसाद मेहता र समर्थकमा शिला दिक्षित कार्की छन् ।

सत्तारुढ गठबन्धनबाट अन्यमा काँग्रेसका पूर्वमहामन्त्री झापाका कृष्णप्रसाद सिटौला र महिलामा माओवादीका केन्द्रीय सदस्य ओखलढुंगाकी चम्पादेवि कार्कीले यसअघि नै उम्मेदवारी दर्ता गरिसकेका छन् । फागुन २१ गते रिक्त हुने काँग्रेसका रमेशजंग रायमाझी र माओवादी केन्द्रकी विना पोखरेलको पदावधि सकिने भएकोले सो पदमा निर्वाचन हुन लागेको हो ।

राष्ट्रियसभाको लागि कोशीमा स्थानीय तहका २७४ र प्रदेशका ९३ सांसद गरी कूल ३६७ मतदाता रहेका छन् । निर्वाचनमा प्रदेशसभा सदस्यको मतभार ५३ र स्थानीय तहका प्रमुख तथा उपप्रमुखको मतभार १९ हुन्छ ।

प्रदेशमा प्रदेशसभाका ९३ सांसदमा एमालेका ४०, काँग्रेसका २९, माओवादी केन्द्रका १३, राप्रपाको ६, एकीकृत समाजवादीको ४ र जसपाको १ जना छन् । सांसदहरुतर्फ एमालेको २१२०, काँग्रेसको १५३७, माओवादीको ६८९, राप्रपाको ३१८, एकीकृत समाजवादीको २१२ र जसपाको ५३ मतभार रहेको छ ।

स्थानीय तहका प्रमुख र उपप्रमुखमा प्रदेशमा रहेका १३७ पालिकाका २७४ मध्ये एमालेका ११०, काँग्रेसका ११५, माओवादीका ३१, राप्रपाका ४, एकीकृत समाजवादीका ७, जसपाका ४ र स्वतन्त्र ३ जना छन् । पालिकामा एमालेको २०९०, काँग्रेसको २१८५, माओवादीको ५८९, राप्रपाको ७६, एकीकृत समाजवादीको १३३, जसपाको ७६ र स्वतन्त्रको ५७ मतभार छ ।

प्रदेशमा एमालेको कूल मतभार ४ हजार २१०, नेपाली कांग्रेसको ३ हजार ७२२ र माओवादी केन्द्रको १ हजार २७८ रहेको छ । यस्तै एकीकृत समाजवादीको ३४५, राप्रपाको ३९४, जसपाको १२९ र स्वतन्त्रको ५७ मतभार रहेको छ । गठबन्धन कायम रहँदा गठबन्धनको पक्षमा ५४८३ मतभार हुनेछ । जुन एमालेको भन्दा १२६४ ले बढि हो ।