Saptakoshinews

Admin

समाचार

01 July, 2025

276

सप्तकोशी न्युज संवाददाता

काठमाडौं । प्रधानमन्त्री पुष्पकमल दाहाल प्रचण्ड र प्रतिनिधसभाका सभामुख देवराज घिमिरेबीच भेटवार्ता भएको छ । भेटवार्तामा घिमिरेले सदनको अवरोध हटाउन दाहाललाई सहजीकरण गर्न आग्रह गरेका छन् ।

प्रधानमन्त्रीको सरकारी निवास बालुवाटारमा भएको भेटमा अवरुद्ध सदन खुलाउने विषयमा छलफल भएको छ । सभामुख घिमिरेले सदनको अवरोध हटाउन प्रधानमन्त्री दाहाललाई सहजीकरण गर्न आग्रह गरेका छन् ।

सदन नचल्नु राम्रो भएन । माननीयहरुले बोल्न समय माग्नुभएको छ । प्राकृतिक विपत्ति लगायतका धेरै विषयमा माननीयहरुले बोल्न पाइनँ भन्नुहुन्छ । दलिय सहमतिबिना सदन अगाडि बढ्न सक्ने स्थिति छैन । आम जनताले पनि सदन अवरोधलाई राम्रो मानेका छैनन् । ,’ भेटमा सभामुखले भने, ‘सदन खुलाउन सत्तापक्ष र प्रतिपक्षले गम्भीरतापूर्वक छलफल गरिदिनुहोस् । समितिको नेतृत्व चयन हुन सकेको छैन । संसदमा कानून निर्माण भएनन् भन्ने गुनासो छ । सभामुखको रुपमा मैले सहमतिका लागि जिम्मेवारीपूर्वक पहल गरेको छु । तर, परिणाममा निस्किन सकेन । शीर्ष नेताहरु नै घण्टौं बस्दा पनि सहमति भएन ।’

सभामुखको सदन सुचारुका लागि समन्वयको आग्रहपछि प्रधानमन्त्री दाहालले निरन्तर रुपमा प्रयत्न गरिएको बताउँदै प्रतिपक्षी एमालेसँग थप छलफल गर्ने बताए । उनले सभामुखलाई एमालेसँग सदन खुलाउने विषयमा सहमतिका लागि पहल गरिदिन सुझाए ।

प्रधानमन्त्रीले भने, ‘म पनि सदन खुलाउन भूमिका खेल्छु । तपाईं पनि लाग्नुहोस् । छिट्टै सहमति गर्नैपर्छ । म प्रमुख विपक्षी दलको नेतासँग थप पहल गर्छु ।’